Shumë rrallë më vie të shkoj për të përcjellë ngjarje të karakterit social. Por pasi në janar isha për përhair në shtëpinë e Bratislavit në Graçanicë, kur mora vesh se në Komunën e Mitrovicës 40 familje po bëheshin me shtëpi të re, vendosa ta bëja të njëjtën gjë. Kjo është ajo që pashë e fola me njerëz që po hynin në shtëpi të reja.
Kur mbërrijta në Mitrovicë ishte ora 10:20. Ishim nja 20 minuta me vonesë dhe tashmë ngjarja kishte nisur. Fjalën e kishte kryetari i Mitrovicës Jugore, Bedri Hamza, dhe mas pas edhe përfaqësuesi i “Qatar Foundation” që është edhe financuesi i këtij projekti.
Në ulëset tek publiku janë familjet që po prisnin shtëpitë e reja. Shumica e tyre janë gra. Përfituesit e këtyre shtëpive janë shumica gra që bashkëshortët ose u kanë vdekur gjatë luftës ose janë të ndarë prej tyre. Për shumicën dita e martë, 28 shkurt, është një ditë që përfundojnë vuajtjet e banimit.
“Që 20 vjet duke jetuar me qera, prej një vendi në vendin tjetër”, thotë një nga banoret. Ajo është Shemsija e cila ishte ndër të parat që mori çelësat. Ajo së bashku me tre djemt e saj do të bëhen me shtëpi. Shtëpia ka një dhomë dite me kuzhinë, dy dhoma gjumi dhe një banjo. Të gjitha shtëpitë janë të mobiluara dhe në gjendje të mirë.
Takohem pas ceremonisë më kryetarin Hamza. Ai më tregon se përpos shtëpive, ky projekt përfshnë edhe një shkollë, një ambullantë dhe një xhami. Nuk çuditem për xhami, duke e ditur se investitori është një Republikë Islamike. Kur e pyes kryetarin se kush e ka qitë kusht, më thotë se “ka qenë kërkesë e banorëve”.
Këtë pyetje doja t’ia bëja shumë banorëve por rrugës takova një grua me fëmijën e saj që ma ndryshoi komplet storjen. Lirija nuk po e gjente dot ku e kishte shtëpinë. Ajo ka muaj që po jetonte në banesa të ndryshme.
“202946 është numri i shtëpisë, nuk po muj me gjetë”, më thot Liria. “Ja po të ndihmojë unë me e gjet”, i them, teksa nisim kërkimin.
Mes gjithë atyre shtëpive, ishte shumë e zorshme ta gjenim shtëpinë. Por pas nja 30 minutave kërkim arritëm ta gjejmë. Shumë lot gëzimi si nga Liria ashtu edhe nga fëmija. Lot gëzimi edhe unë si gazetar, edhe pse shumë shpesh nuk dua të përfshihem në këtë emocion.
Por sesi shkoi i gjithë kërkimi, se çfarë janë kushtet brenda shtëpive, brenda Ambulantës dhe Xhamisë që ende nuk është hapur, shikojeni videon e plotë.