Reshje intensive bore kanë filluar sonte në shumë pjesë të Kosovës. Nga Prishtina, Mitrovica, Fushë Kosova e Podujeva, qytetarët kanë ndarë video e fotografi nga bora që këtë dimër ka munguar. Portali për parashikimin e motit, MeteoBallkan ka publikuar disa video nga disa qytete të Kosovës ku tashmë kanë nisur reshjet.
Për të premten parashikohet të ketë reshje bore gjatë orëve të para të 24-orëshit, lokalisht të dendura, ku priten edhe shtresa. Megjithatë, të paqëndrueshme. Dita do të vijojë me diell dhe vranësira, të cilat më shtuara pritet të jenë në Rrafshin e Kosovës, me mundësi për ndonjë reshje të izoluar bore, veçanërisht në orët e mëngjesit. Krejtësisht vonë në mbrëmje, pak para mesnatës, pritet të arrijë një valë e re me të reshura bore. Era do të fryjë drejtimesh të ndryshme, e cila kohë pas kohe pritet të jetë e fuqishme, me shpejtësi prej 17-47 km/h!
Temperaturat minimale do të luhaten prej -4 deri në -1°C, ndërsa ato maksimale prej 4 deri në 8°C. /MeteoKosova/