Plagët që mori nga zjarri të cilin dyshohet se e ndezi vetë, dolën të jenë fatale për 35-vjeçaren nga Peja, Sihana Berisha, raporton Gazeta Sinjali. Zemra e saj pushoi së rrahuri pas tetë ditësh trajtim në Mjekimin Intensiv në Qendrën Klinike Universitare të Kosovës, me ç’rast vdekjen e ka konstatuar mjeku kujdestar.
Familjarët, miqtë dhe të afërmit e të ndjerës do të mblidhen nesër për t’i dhënë lamtumirën e fundit Sihanës e cila u nda nga jeta në moshë të re. Varrimi i saj do të bëhet në orën 15:00 në varrezat e qytetit, ndërsa funerali niset nga Gasallhanja e varrezave. Ndryshe lajmin për vdekjen e 35-vjeçares e ka konfirmuar për Sinjalin drejtori i Klinikës së Anesteziologjisë dhe Mjekimit Intensiv Qendror, Gazmend Spahija.
“Pacientja ka ardhë me djegie prej 90 për qind të trupit dhe është trajtuar në mjekimin Intensiv. Gjendja ka qenë shumë e rëndë dhe këto djegie me sipërfaqe të mëdhaja, e kanë një përfundim shumë të keq, është shumë vështirë me i trajtu”, u shpreh Spahija. Rasti i zjarrvënies kishte ndodhur ditë më parë në lagjen Emshir të Prishtinës.