Ishte një çift i devotshëm. Burrë dhe grua ishin në emigrim. Burri kishte ngritur dhe drejtonte një biznes të suksesshëm, por një ditë pati humbje të mëdha dhe i shteruan të gjitha paratë. Që prej asaj dite dhe në vijim, ai humbi interesin për gjithçka. Nuk hante, nuk pinte, nuk kalonte kohë me familjen dhe nuk bënte asgjë.
U mbyll në vetvete. E vetmja gjë që bënte ishte të shqetësohej për gjithçka. Gruaja e tij ishte shumë e zgjuar dhe besimtare. U mundua ta ndihmonte burrin e saj. Pas shumë përpjekjesh, më në fund asaj i erdhi një mendim se si ta bënte këtë.
Një ditë, ajo u paraqit para burrit e veshur e gjitha me të zeza. Siç e dimë, gratë vishen ashtu kur dikush ka ndërruar jetë. Kur e pa të shoqen të veshur në këtë mënyrë, i shoqi pyeti i habitur: “Çfarë ka ndodhur që je veshur e gjitha me të zeza? A mos ka ndërruar jetë dikush?” Gruaja u përgjigj: “Po, kam marë vesh se Zoti nuk është më”. Kur dëgjoi këtë, burri tha: “Si ka mundësi?! Pse po e nxjerr nga goja diçka të tillë?”
E shoqja tha: “Sjelljet e tua këto kohë më bëjnë të mendoj diçka të tillë. Ti po jeton tashmë sikur Zoti nuk është më për ty. Ti gjithmonë kishe besim tek ai dhe thoje se gjithçka që ndodh në këtë botë, ndodh me vullnetin e tij. Sot ti jeton sikur nuk ka mbetur gjë më për ty”.
Kur dëgjoi të gjtha këto, i shoqi tha: “Unë kam besim të plotë tek ai, por jam shumë i shqetësuar, si do të mundet ai të paguajë për shpenzimet e fëmijëve”.
Gruaja iu përgjigj: “Ti tashmë je 50 vjeç dhe gjithmonë ke punuar shumë. Përgjatë jetës sonë deri më sot, ne kemi parë dhe kemi kaluar shumë ulje dhe ngritje dhe ia kemi dalë t’i përballojmë. Edhe kjo periudhë me probleme do të kalojë”.
I shoqi e kuptoi se duhet të ndryshonte diçka. Ai ia mori dorën gruas së tij dhe i tha: “Më fal që të kam shqetësuar, unë i besoj Zotit dhe me ndihmën e tij do ta kalojmë edhe këtë”.
Që prej asaj dite, sjellja e burrit ndryshoi. Në vend të vetmisë dhe shqetësimit, ai filloi të punojë shumë përsëri me shpresën se një ditë gjithçka do të kthehet në normalitet. Shpresoj që t’ju ketë pëlqyer ky tregim. E mora te një faqe simpatike me Histori Motivuese.