Hoxha që dyshohet se ushtroi dhunë fizike ndaj të dashurës vazhdon punën – po “shëron” pacientë me Kuran
Janë bërë më shumë se një javë që kur hoxha nga Obiliqi, Behar Mjekiqi u denoncua në Polici të Kosovës për dhunë nga e dashura e tij nga Maqedonia e Veriut. Janë deklaruar nga Prokuroria, nga Bashkësia Islame atje por nuk e ka thënë asnjë fjalë vet hoxha i përfshirë në këtë rast.
Pavarësisht insistimit për të marrë një përgjigje nga Mjekiqi, ky i fundit nuk e ka thënë as edhe një fjalë. Ndonëse po tenton ta tejkalojë situatën e shkaktuar me heshtje, punën po e vazhdon. Po shëron pacientë me Kuran.
Insajderi ka provuar të kontaktojë me hoxhën edhe përmes asistentëve të tij, të cilët merren me termine, por të njëjtin thanë që mund t’i shkruani në Facebook. Nuk treguan nëse po e vazhdojnë punën, përgjigja ishte “ne veç termine caktojmë, s’mund të them asgjë, kontaktojeni në Facebook”.
Pas kësaj, në po të njëjtin numër u kontaktua sërish asistentin e Mjekiqit, kësaj radhe u paraqitëm si palë. Konfirmuan se puna është duke u zhvilluar, rrjedhimisht që mund të takohemi me hoxhën në orët e hershme të mëngjesit.
“Po hoxha është duke punuar, mund të vini nesër nga ora 07:00”, deklaroi shkurt punëtori i hoxhës.
Mjekiqi është denoncuar për dhunë ndaj të dashurës së tij, të martën e 20 dhjetorit. Mjekiqi e kishte larguar nga shtëpia të dashurën me të cilën kishte qenë duke bashkëjetuar. Më pas ajo e kishte denoncuar imamin në polici për dhunë në familje.
Imami i Obiliqit, Behar Mjekiqi është denoncuar për dhunë ndaj të dashurës së tij, të martën e 20 dhjetorit. Mjekiqi e kishte larguar nga shtëpia të dashurën me të cilën kishte qenë duke bashkëjetuar. Më pas ajo e kishte denoncuar imamin në polici për dhunë në familje.
Lajmi është konfirmuar edhe nga Policia e Kosovës, ku potencohet se viktima ka pranuar tretman mjekësor.
“Obiliq 20.12.2022 – 18:30. Ankuesja femër shqiptare ka raportuar se i dyshuari mashkull kosovar me të cilin ka qenë duke bashkë jetuar, e ka larguar nga shtëpia. I dyshuari, është intervistuar në cilësinë e të dyshuarit. Viktimës iu është ofruar tretman mjekësor. Në lidhje me rastin është konsultuar prokurori i shtetit i cili ka rekomanduar që i dyshuari të lirohet dhe rasti të procedohet në procedurë të rregullt”, thuhet në raportin e PK-së.
IPK ka nisur hetimet ndaj zyrtarëve të përfshirë
Nga Inspektorati Policor i Kosovës në një përgjigje për Insajderin kanë konfirmuar se tashmë kanë nisur të grumbullojë informacione në lidhje me dyshimet e raportuara në media.
IPK thotë se tashmë ka pasur kontakte me zyrtarë të Stacionit Policor të Obiliqit dhe zyrtarë të tjerë, përshirë edhe kontaktin me Prokurorin e rastit.
“Duke ju referuar kërkesës suaj ju konfirmojmë se IPK sipas detyrës zyrtare (ex officio) ka filluar të grumbullojë informacione pas publikimit të lajmit në medie lidhur me këtë rast. Krahas grumbullimit të informacioneve nga hetuesit e IPK-së janë ndërmarrë edhe veprime hetimore konkrete që kanë përfshirë kontakte me zyrtarë të Stacionit Policor të Obiliqit dhe zyrtarë të tjerë përshirë edhe kontaktin me Prokurorin e rastit. Veprimet tjera do të ndërmirren bazuar në autorizimet ligjore të IPK-së”, thuhet në përgjigjen e IKP-së dhënë Insajderit.
“E dashura, e ç’dashura” – kryeimami i Obiliqit deklarohet për rastin e hoxhës Behar Mjekiqi
Gazeta Insajderi ka kontaktuar kryeimamin e Obiliqit, Izedin Krasniqi, për të kuptuar se cili është qëndrimi i tyre si Bashkësi Islame.
Krasniqi konfirmoi se është takuar me hoxhën Mjekiqi, por që nuk di detaje të rastit.
“Nuk kemi kurrfarë njohurish për këtë që po më pyet, aq sa dini ju di edhe unë personalisht. Po jemi takuar (me Behar Mjekiqin) kemi pasur mbledhje dhe njësoj siç dini ju dimë edhe ne, asgjë më shumë”, tha Krasniqi për Insajderin.
Duke pasur parasysh që imami, Behar Mjekiqi është i martuar dhe ndërkohë është kuptuar se ka bashkëjetuar edhe me një grua tjetër, kryeimami i Obiliqit është pyetur se si e parasheh feja myslimane këtë veprim të Mjekiqit.
Krasniqi nuk ka hezituar ta cilësojë si tendencioze, pjesën e referimit si “e dashura” e hoxhës.
“Nuk kam koment më shumë për këtë çështje, kjo mendoj që është tendencioze nuk kam diçka më shumë me thënë. Por kjo pjesa e dashura, e ç’dashura, ku ta di unë më shumë nuk mundem asgjë me thënë. T’i lëmë organet e hetuesisë ta bëjnë punën e tyre, edhe le të del e vërteta në shesh të jemi të gjithë okej”, tha kryeimami.
Lidhur me rastin për Insajderin detaje kanë dhënë nga Prokuroria Themelore në Prishtinë.
Zëdhënësja e kësaj prokurorie, Laureta Ulaj të enjten konfirmoi se viktima ishte pyetur nëse do të shkojë në strehimore por që e njëjta kishte kërkuar të kthehet në shtëpinë e saj në Maqedoninë e Veriut.
“Rastit të cilit i referoheni, ju njoftojmë se me të marrë informatën, prokurori kujdestar me kujdes dhe në mënyrën më të mirë të mundshme i ka analizuar dhe trajtuar të gjitha informatat dhe të gjeturat fillestare të këtij rasti. Viktimës i është ofruar gjithë ndihma e nevojshme, po ashtu, e njëjta është pyetur nëse dëshiron të shkojë në Strehimore, mirëpo ka refuzuar dhe është shprehur se dëshiron të shkojë në shtëpinë e saj”, deklaroi ajo.
Ajo shtoi se rasti është iniciuar si “dhunë në familje”.
“Ndërkaq, prokurori kujdestar ka urdhëruar që rasti të hapet (iniciohet) për dhunë në familje dhe të trajtohet tutje konform dispozitave ligjore të Kodit të Procedurës Penale të Republikës së Kosovës”, deklaroi Ulaj për Insajderin.
Bashkësia Islame e Kosovë hesht për dhunën e ushtruar nga Mjekiqi
Për rastin e Mjekiqit, Bashkësinë Islame të Kosovës, që udhëhiqet nga imami Naim Tërrnava nuk ka reaguar asnjëherë deri tani.
Gazeta Insajderi ka dërguar pyetje në BIK për të kuptuar se cili është qëndrimi i tyre për bashkëjetesën e imami Mjekiqit me të dashurën, duke e ditur se feja islame nuk e lejon një gjë të tillë.
Të njëjtit nuk kanë kthyer përgjigje deri në publikim e lajmit.