Rita Ora: Gjuhën shqipe s’e di me përsosmëri, por mund ta shkruaj dhe lexoj
Këngëtarja shqiptare me famë botërore, Rita Ora risolli sërish në vëmendje Kosovën dhe shqiptarët gjatë një interviste në podkastin e famshëm “The Diary Of A CEO”, në një episod të titulluar “I Lived With Constant Anxiety”, përcjell albinfo.ch.
Biseda nisi me shpërnguljen e familjes së saj në Londër nga Kosova, kur Rita ishte vetëm një vjeçe, dhe motra e saj, Elena, dy vjeçe.
“Unë jam nga Prishtina në Kosovë, nga një shtet i quajtur Kosovë. Është i vogël, i mrekullueshëm. Unë erdha në Mbretërinë e Bashkuar kur isha një vjeçe në vitin 1991. Kam lindur në 1990 dhe ishim refugjatë nga lufta në Kosovë dhe kam jetuar në Londër që atëherë”, tha Rita përballë Steven Bartlett.
“Ka shumë gjëra që prindërit më mësuan pa e ditur, si për shembull gjuha shqipe, e cila ka qenë gjithmonë e folur në shtëpinë time, kështu unë fatmirësisht mund të flas dy gjuhë. Nuk jam e mrekullueshme në shqip, por mund të kuptoj, lexoj dhe shkruaj”, tha Ora.
Në po të njëjtin podkast, këngëtarja shqiptare foli për problemet me ankthin si dhe vështirësitë në karrierë, siç ka qenë gjyqi i famshëm me ish-shtëpinë e saj diskografike, “Roc Nation”, në krye të së cilës është reperi i famshëm Jay-Z.
Më pas, interpretuesja e hitit “Lonely Together” tregoi se sa të vështira ishin fillimet e familjes si refugjatë në Angli, kur atyre iu dha në ndihmë një dhomë nga shteti.
“Ishte një dhome qe na u dha neve nga qeveria, dhe nuk ishte një shtëpi këshilli, ishte më shumë si një shtëpi e përkohshme, kjo është ajo që mbaj mend. Pastaj ne u shpërngulëm në një apartament të dhënë nga Këshilli në Londrën Perëndimore, dhe më pas kam jetuar atje prej se e mbaj mend veten”, theksoi Rita.
Ajo tha se prindërit e saj, Vera dhe Besniku, kanë qenë aq të përkushtuar në rritjen dhe edukimin e fëmijëve, sa u kanë mësuar atyre shumë gjëra, pa harruar gjuhën e tyre amtare.