Një ngjarje e rëndë ka ndodhur paraditen e sotme në Prishtinë, ku një i ri ka humbur jetën në mënyrë të papritur, raporton Gazeta Sinjali.
Burimet e Gazetës Sinjali brenda Emergjencës kanë bërë me dije që kanë pranuar thirrje për ndihmë, pasi që një person në kompaninë e call center ‘Teleperformance’, ishte pa ndjenja dhe dyshohej se ishte në rrezik për jetën. Ekipi mjekësor i Emergjencës ka dalë menjëherë në vendin e ngjarjes ku kanë hasur në trupin e viktimës dhe pas ekzaminimeve për shenjat vitale, mjeku ka konstatuar vdekjen e tij.
Lidhur me rastin është njoftuar edhe Policia e Kosovës të cilët kanë dalë në vendin e ngjarjes, ku në kuadër të veprimeve hetimore kanë marrë pamjet e kamerave të sigurisë dhe kanë intervistuar dëshmitarët e rastit. Sipas recepsionistes së kompanisë e cila ishte duke i kryer fotografitë e të ndjerit për ta pajisur atë me kartelën që i mundëson hyrje-daljet në objekt, i ndjeri ka pasur marramendje dhe është rrëzuar në tokë.
Po ashtu prezent ishte babai i të ndjerit i cili ka thënë se djali i tij ka pasur edhe më herët telashe shëndetësore dhe ka refuzuar që trupi i tij të dërgohet për obduksion. Kjo për shkak se vdekja e viktimës ka ardhur nga shkaqe natyrore. Sinjali mëson se bëhet fjalë për një person të moshës 28-vjeçare, teksa do t’iu mbajë të informuar me detajet e reja lidhur me rastin.
Sinjali mëson se viktima është Agon Shabani, 28-vjeçar. Vdekjen e Agonit e ka konstatuar mjeku kujdestar që doli në vendin e ngjarjes bashkë me ekipin e Emergjencës, teksa bëhet e ditur se vdekja e tij ka ndodhur për shkaqe natyrore. Sipas njoftimit të familjarëve, ceremonia mortore do të mbahet nesër në orën 12:00 në varrezat e fshatit Bec në Gjakovë.